Libertat: pa ken?
Na ougùstùs e obra teatral FREE TO BE FREE (LIBER PA TA LIBER) ta bin Punda
Kon liber bo ta pa ta liber? E kontesta riba e pregunta akí ta diferente pa tur hende. E obra teatral Free to be Free ta bai tokante libertat i resistensia i por wak e obra entre 20 pa 24 di ougùstùs 2024 na Kòrsou. Teatro KadaKen ta produsí e obra huntu ku Sites of Memory for di Hulanda i Biblioteka Mongui Maduro na Kòrsou. Despues di presentashonnan eksitoso di e produkshon akí di Sites of Memory na Amersfoort, Deventer, Utrecht i Amsterdam, partner- i kreadónan a sigui desaroyá e obra den unu kaminda storianan di Kòrsou ta pará sentral. Huntu ku esei, riba 25 di ougùstùs nan ta organisá un programa di kòmbersashon teatral na Biblioteka Mongui Maduro, kaminda e kreadónan i historiadónan ta bai kòmbersá ku otro i kompartí sierto esena for di e obra.
E produkshon Free to be Free (Liber pa ta Liber) ta un obra na lokashon. Ta hiba públiko den storianan i na sitionan ku ta konektá ku Punda su historia kolonial. Pa medio di baile, teater, poesia i músika ta rebibá storianan deskonosí. Nos ta sigui un ruta teatral ku ta kuminsá den Fortkerk, kaminda e kreadónan ta inbestigá papel di sierto institutonan den pasado kolonial i di sklabitut. Despues di esaki nos ta move via Korte di Hustisia pa e lokashon final kaminda interakshon ku naturalesa i laman ganchu ta pará sentral.
A desaroyá Free to be Free spesialmente den kuadro di e aña konmemorativo di abolishon di sklabitut na Hulanda i su (èks) kolonianan na 1863/1873. Hopi ta esnan ku te ainda ta sinti impakto di e pasado akí. Hopi hende, diariamente ta eksperensiá rasismo institushonal. No a terminá prosesonan di sanashon i kòmbersashon riba reparashon. Tanten ku no atendé di forma struktural ku rasismo i eksklushon, ku ta sali for di un pensamentu kolonial i pasado di sklabitut, e siguiente pregunta ta relevante: libertat, pa ken? Kiko e luchadónan pa libertat di den pasado a traspasá pa nos? I esnan ku ta defendé libertat awendia? Kiko nos sa di opreshon i resistensia kontra esaki?
Theaterkrant (Korant di Teater) a skibi lo siguiente tokante Free to be Free na Utrecht (2023): “E ta duna espasio pa mustra historia di sklabitut for di diferente perspektiva i ku esaki ta rekonosé su enorme magnitut.”
Estreno di Free to be Free na Kòrsou, lo tuma lugá riba djarason 21 di ougùstùs 2024 di 7or pa 9or di anochi. Despues di esei, por presensiá e obra riba 22, 23 i 24 di ougùstùs, tambe for di 7or di anochi. E obra mes ta dura 75 minüt i ta kuminsá den Fortkerk. Ta un obra na diferente idioma ku fragmento na papiamentu, ingles, hulandes i sranantongo. Pa kana e ruta teatral kòrtiku akí nos ta rekomendá tur hende pa bisti sapatu kómodo. Nos ta sera e anochi ku un kombersashon kòrtiku.
Por haña karchi na Mensings Caminada, Sentro di pago Tu y Yo i online na Caribbean Ticketshop.com.
Reservá un karchi di prensa i hasi bo preguntanan dor di manda un mail pa info@teatrokadaken.org
