Teatro KadaKen ta presentá: Piar: E Último Bataya
KOMUNIKADO PA PRENSA
Teatro KadaKen ta presentá Manuel Piar, e Último Bataya, un obra teatral musikal emoshonante tokante e delaster dianan di General Manuel Piar, e yu di Kòrsou luchadó pa libertat ku a hunga un ròl krusial den independensia di Gran Colombia, ku ta inkluí Venezuela.
E obra ta hiba e públiko bèk na 1817, na Guayana, estado Angostura, awendia Ciudad Bolivar, na e riu venezolano Orinocco. E ta presentá e momentunan dramátiko rondó di aresto di Piar, su huisio militar i e diskushonnan tenso entre Simón Bolivar i atmiral Luis Brion,ku a purba sin éksito pa evitá huisio di su kompatriota. Den esenanan intenso ta aparesé tambe Piar su mama, Maria Isabel, un muhé liber ku su kurashi i independensia a inspirá Piar hinter su bida, i su tata Fernando, un nabegante hopi biaha ousente. Kaminda e tata ta purba di strob’é pa e no resistí e poder kolonial, tur dos ta rekonosé, ku rèspèt, nan diferensia den punto di bista i, nan afekshon pa otro.
E pueblo, representá pa aktornan ku ta hunga ròl dòbel, ta mustra nan indignashon. Pero tòg Piar ta skohe pa último paso: e ta ninga di hui. E ta aseptá e morto komo mártir, konvensí ku un dia historia lo rekonosé loke el a bringa pe realmente – pa libertat i abolishon di sklabitut, pa independensia i demokrasia, i pa rekonosimentu di esnan sin bos: esnan hasí katibu, indígena, tur hende krioyo.
Apesar ku e akontesimentu aki a pasa mas ku dos siglo pasá, e mensahe ta ekstremadamente aktual. Manuel Piar, e Último Bataya ta pone bo pensa riba libertat i demokrasia, i ta laga mira ku ta rekerí kurashi pa lanta para kontra di inhustisia i poder outoritario. E ta enfatisá e importansia pa rèspèt i igualdat, i e ta mustra e forsa di union regional, manera e tempu ku a sostené Pètition di Haiti.
Banda di esei, e historia di Piar mirá den un perspektiva históriko mas amplio ta un historia ku ta similar na esun di su kontemporáneo Tula i tur otro ku a duna nan bida pa libertat i igualdat.
E produkshon ta di KadaKen, bou di guia di direktor Lou Nisbet. E teksto ta di Franklin Salgado i adaptá pa Milushka Birge ku ta enkargá tambe ku direkshon artístiko. Durante tres luna di treinen intensivo, Miluskha a dirigí seis aktor hóben talentoso i a krea un obra emoshonante. E aktornan ta Karla Carbonell Gómez, Maxine Fabian, Tisjaira Martina, Alejandro Marquez Lorenzo, Kendrick Girigori i Ralph Winedt. Guia musikal ta den man di Eric Calmes, ku huntu ku e elenko a sòru pa muzik bibu i kantika ku ta resaltá emoshonnan den e obra.
Estreno di Piar, e Último Bataya pa públiko general ta riba djaweps 30 di òktober den Teatro AULA Habaai. Siguiente fecha di funshon ta 31 di òktober, 1,2,8,9, 29 i 30 di novèmber. Tur funshon ta kuminsá 8 or di anochi.
Invitashon pa skolnan i organisashon di bario
Skolnan i organisashon ku tin interes di haña un presentashon òf kòmbersashon despues ta bon biní pa tuma kontakto ku Teatro KadaKen. E obra aki ta ideal den konteksto sosial i edukativo. E historia di Manuel Piar ta brinda entrada pa kòmbersashonnan balioso tokante di libertat, demokrasia, poder, identidat, género i inklusividat – temanan ku ta mishi ku hóbennan i sosiedat di awendia. Por tuma kontakto ku Teatro KadaKen na telefòn 672-4580 i via di meil info@teatrokadaken.org.
Karchi ta optenibel na Mensings Caminada, Van den Tweel Supermarket, Sentro di pago Tu y Yo i online via Caribbean Ticketshop.
