Brindis ku Tambú di Teatro KadaKen den sala monumental AULA

Djaweps último, Teatro KadaKen a selebrá final eksitoso di aña 2025 ku un brindis pa tur kolega, amigu i relashon. A reflekshoná riba e promé aña ku a kuminsá ku implementashon di e programa multianual 2025–2028, pa kua KadaKen a risibí, pa promé biaha, un supsidio di Fonds Podiumkunsten.

Banda di tira un bista riba e funshonnan ku tabatin i antisipando esnan ku lo bin, KadaKen a duna hopi atenshon na AULA Habaai tambe. Produktor Lou Nisbet a hasi uzo di diferente potrèt pa konta historia di e sala monumental akí, su renovashonnan huntu ku Birgen di Rosario i CuraDoet. Pa di promé biaha a kompartí ku públiko realisashon di un etapa nobo den e proseso pa profeshonalisá AULA su funshon komo teater. For di komienso di aña 2025 AULA tin fasilidatnan tékniko, diseñá pa Etienne Pieters i finansiá pa Tania Kross.

AULA Habaai ta awor un tarima madurá pa karga produkshonnan propio, lokal i internashonal, pa kolaborashon ku kreadó-i investigadónan, i tambe un lugá di enkuentro pa sektor kreativo. Durante e brindis tabatin sopi di konfó i tur hende a lòs e pia- i hepnan poko.

Den e oula skolar di ántes di Sùrnan di Roosendaal, konstruí na 1930, Ali i su amigunan a laga un i tur gosa di i move riba e bunita zonidonan di seú i tambú. Asina AULA a biba un momento históriko, ku ta kuadra ku loke KadaKen (literalmente: tur hende) ta para p’e, esta eksplorá i selebrá, via arte di tarima, nos mes raisnan kultural i nos historia, sin ekskluí ningun hende.

Potrèt di brindis: Moon 25 Pictures