Kas di Teatro KadaKen ta Teatro Aula den Wishi, konstruí 1930 den Huize Welgelegen, mihó konosí komo Habaai. Nos ta bèk na kas. Pasobra na 2009 e lugá akí tabata e lugá di nos promé presentashon. Nos a aktua den un oula bashí i deteriorá, sin podio. Públiko tabata sintá riba stul plamá den e espasio.
E interakshon ei tabata nèt loke nos tabata buska. El a pas ku e estilo progresivo i úniko di direktor di teatro Albert Schoobaar. Albert a funda (òf lanta, kuminsá ku) Fundashon Teatro KadaKen na 2008, huntu ku aktris Norma Cova i direktor… Lou Nisbet. Albert i Norma tur dos tabatin un papel den e promé obra pa hóben di e fundashon: “E dekonstrukshon di Edsel K.”.
Ta e palabranan na Papiamentu di Albert ku ta pone hóbennan hari i yora: ta nan palabranan, ta nan mundu.
E kuminsamentu ei. Un periodo spesial! Esaki ta e fundeshi: sinku produkshon teatral bou di direkshon artístiko di Albert. Esaki ta e herensia: e estilo akí, e ideanan akí, e produkshonnan akí.
Despues, Lou Nisbet i e direktiva a tuma e batuta. Nan a sigui desaroyá e plataforma úniko pa Teatro KadaKen. Nan a hasi esaki huntu ku direktornan nobo ku tin un urgensia fuerte pa konta kuentanan ku ta sosialmente relevante.
Dies aña despues, tur pida di e pùzel a kai na lugá. Organisashon di kuido Bírgen di Rosario tin maneho di Huize Welgelegen. Na 2018, bou di guia di Indra Rossen -Lucasius, ku tabata resien apuntá direktora di Bírgen di Rosario e oula ku tabata deteriorá i den uso komo bèrghòk a risibí atenshon.
Ku un bon limpiesa i drecha e flur di palu i bentananan di shùter, nan a tuma promé paso pa hasi e teatro disponibel atrobe pa públiko. Tur esaki a sosodé den e temporada ku Teatro KadaKen tabata manehá teatro La Tentashon na Otrobanda.
Na 2020, KadaKen a hiba kòmbersashon pa kolaborashon ku Bírgen di Rosario i a formalisá e kolaborashon den un kontrato firmá pa e direktiva i Lou Nisbet. Birgen di Rosario i Teatro KadaKen a haña otro den un vishon kompartí pa uzo di e espasio históriko i úniko akí: ku yòn i bieu por disfrutá akinan di arte, obra teatral i kultura i ku e sitio krese bira e sentro di podio artístiko na Kòrsou. Novèmber di 2021 ta apertura ofisial di Teatro Oula.