Rekonosé, esei ta nos sekreto. E personahenan, e idioma, e muzik, tur ta loke bo ta tende i loke bo ta mira. Bo ta sintié. E doló, e inhustisia, e amor, e felisidat. Bo ta laga bo mes bai den e bos di e aktornan. Pa un otro mundu, un otro tempu. I asina bo ta deskubrí forsa di teatro. Esaki ta bo kuenta tambe.
Disfrutá di e presentashon. Sinta kómodo, pero pone bo orea na prim. Nos gusta tende bo sesu krak. Nos obranan semper ta tokante problemanan sosial grandi i desafionan importante. Un figura históriko, e mundu di droga, un famia di un mayor. Esaki ta teatro ku harimentu I yoramentu, kargá ku humor i emoshon, meskos ku bida real. Pero tambe tribí, vibrante, ku ta stimulá i reta.
Bo ta mira bo mes den e mucha ku ta krese sin tata? Bo tin un amiga ku ta adikto na droga? Bo ta kere ku bo ta liber? Bo por hasi loke mas bo gusta? Bo por ta ken bo ta di bèrdat? Paga tinu! Nos presentashonnan ta gara bo. Nos ta spera ku nos ta pone bo pensa i inspirá bo.
E kortina ta baha, pero e presentashon ta sigui. Den nos salon teatral i den skolnan. Públiko ta sigui diskutí. Alumnonan i dosentenan ta profundisá riba e tema. Den e periodo di 2025-2028 e tema ta libertat. Basá riba nos obranan hóben i adulto ta buska huntu esensia di libertat i demokrasia, inspirá pa nos produkshonnan. Kiko esaki ta nifiká pa bo bida i bo manera di pensa?