‘Chakutoe’

Deskripshon

Chakutoe ta un presentashon teatral kritiko ku ta trata un período poko konosí den historia di Kòrsou. E obra ta tuma komo punto di partida welga di haf di 1922 bou di guia di Felix Chakutoe, pa mustra temanan universal den un konteksto históriko, sosial i kultural.

Chakutoe, ta hiba bishitante bèk na Kòrsou di 1922. E haf di Kòrsou ta pasa un tempu di gloria i e òrdu establesí ta interesá den kontinuashon di kresementu ekonómiko, defendiendo interesnan di kompanianan di barku. Pero ora nan disidí baha salario di trahadó di haf drástikamente , ta surgi un situashon eksplosivo.

E kuenta ta kontá for di e ángulo di kondishon di bida di famia Hendriksen-Schilder. Yu Tirso ke bira un lider. E ta inspirá pa Hesus i Tula, i e ta gusta lesa i resa, pero e tin difikultat pa haña su mes kaminda. Ora su ruman muhé Magdalena ta demostrá su mes komo un lider berdadero, Tirso ta hañ’é den un situashon difísil…
E konformá su mes na normanan sosial, òf e ta skucha su bos interno?

E obra ta skibí i dirigí pa Gibi Bacilio, ku tin un karera di dékada den teatro di Kòrsou. Den Chakutoe, Bacilio ta mustra su banda fuerte dunando su aktornan vários personahe den e obra, loke ta pone nan talento diversifiká resaltá. Esaki ta konta pa e aktornan di mas eksperensiá Norma Cova i Albert Schoobaar, pero sigur tambe pa talentonan hóben Tisjaira Martina, Guenn Ramon Gustina i Roley Kelkboom.