Nos ta produktor di teatro, aktor, músiko, skibidó di guion. Nos ta tur esnan kreativo ku, huntu, ta hasi un obra teatral prèt, bunita, tenso i interesante. For di 2008 nos ta traha riba presentashonnan pa hóben i adulto. Nos perspektiva semper ta artístiko, sosial i edukativo.
Nos tin un mishon. Nos ta krea produkshon teatral den format di nivel haltu artístikamente. Esaki ta obranan teatral ku ta kibra tabú. Nan ta pone hóbennan pensa. E ta punto di konekshon pa maestro ku ta usa nos programa edukativo pa amplia riba e tema. Pero tur hende, kada ken, por haña nan mes den nos produkshon. Loke bo tende, loke bo mira, e muzik, e idioma, e wega. Nos no ta ekskluí ningun hende. Asina nos ta den kòmbersashon ku otro. Tur biaha di nobo.
Nos tin un vishon. Provoká i hala atenshon. Teatro ta bon pa esaki. Nos ta sigur di esei.
Nos ta hasi esaki ku obranan nobo, kontá for di un ángulo diferente i hungando ku idioma, moveshon i espasio.
Nos estilo artístiko ta kontribuí na bo konsientisashon i na esun di komunidat. Nos ta skohé pa profundidat. Nos produkshon ta yega serka. Nan ta tokante bo mes i bo situashon. Nos ta papia bo idioma, nos ta uza teknologia moderno, i nos ta honra tradishonnan di e isla, manera farandula, baile i teatro di pòpchi. Ta un wega entre públiko i intérprete, entre aktor i direktor di teatro, entre bailarin i koreógrafo. Nos ta traha huntu ku nos partnernan i organisashonnan den mundu di teatro di Kòrsou. E kolaborashon ei, e kombinashon di interakshon i ko kreashon, ta e fundeshi. Nos tei pa keda.
Na 2024, nos trabou i perseveransia a duna fruta den forma di un supsidio di vários aña for di Fondo Podiumkunsten. Ku e sosten finansiero akí pa mínimo kuater produkshon nobo, nos por pone riba pia un organisashon pa futuro, i traha pa nos presentashonnan tin un alkanse i impakto mas grandi. Ku esaki, talentonan hóben i nobo tambe ta risibí oportunidat pa desaroyá nan mes, por ehèmpel komo aktor, tékniko òf asistente di produkshon.
Nos ta e kreadónan
Gerensia
Milushka Birge
Milushka ta pone un spil bo dilanti pa bisa bo pa bo no lubidá ken bo ta. Esaki segun Milushka ta esensia di teatro. Pa esei, el a skohe den 2022 pa presentá ‘E hòmber ku a bira un kachó’ durante e festival di kaya Kaya Kaya na Otrobanda. E tema ta tokante deshumanisashon i pèrdida di identidat. E ta kòrdé kon hende por afektá otro. E obra teatral apsurdo akí a mishi ku su kurason for di e momentu ku el a les’é durante su tempu di studiante na Hogeschool voor de Kunsten na Utrecht. Pero na 2022 na Kòrsou e mensahe di e tempu ei ta e realidat duru. Durante e añanan, Milushka a aktua den diferente ròl den teatro na Hulanda. Awendia na Kòrsou e ta traha komo guionista i direktor. Prepará bo ora bo ta bai wak obra di Milushka. Su temanan ta salí for di bida mes. Kiko otro kos bo por spera di un muhé ku tin mas ku sinkuenta aña den e profeshon akí? E ke pone hende pensa i trata tema ku ta di importansia pa komunidat. P’e esei Teatro KadaKen ta risibí su kreatividat ku man habrí. E dos obranan resien ku Milushka a dirigí den 2023 i 2025 den kolaborashon ku Teatro KadaKen ta Rumannan Purunchi i Piar. Aworaki e ta trahando riba un obra pa mucha ‘Den Mondi di Kabayé’, ku lo estrená den 2026 den Teatro Aula.
Juan-Carlos Goilo
Juan-Carlos Goilo for di chikí tabata buska kiko ta e konekshon entre palabra, ritmo i zonido. Na mucha el a kanta den un kor na Kòrsou i komo adolesente el a toka den un banda di pùnk. Juan-Carlos ta antropólogo i artista. E gusta diversidat. E tin eksperensia den mundu di arte, pero tambe ku empoderashon i maneho. P’esei bo por mir’é komo un ‘diseñadó di kultura’. Esaki ta trata historia, identidat, hustisia i klima. Juan-Carlos ta un kontadó di kuenta i riba podio, loke nan el a investigá i su trabounan komunitario ta bin huntu. Loke ta parse apstrakto i kompliká direpente ta bira konkreto i ta zona familiar. E ta un di e kreadornan di Teatro KadaKen i ta direktor i guionista di e obra teatral Mariana Franko, ku lo estrená na 2027 den Teatro Aula. Juan-Carlos gusta pone na kla historia skondí. Hopi biaha nan tin relashon ku historia di Kòrsou, pero kontá for di un ángulo diferente for di esun ku nos ta kustumá kuné. Esei ta eksaktamente motibu dikon Juan-Carlos ta traha ku nos: un wega di ángulo, inklushon di bos ku bo no ta tende hopi. Un kos típiko di Teatro KadaKen.
Gerensia
Maryluska ‘Lou’ Nisbet
Lou Nisbet tabata parti di Fundashon Teatro KadaKen for di su kuminsamentu. Despues di studia Bedrijfskunde na UNA i Menaho i Organisashon na Universidat di Tilburg, el a kue eksperensia na Hulanda. El a bin bèk su isla natal Kòrsou i na 2009 el a produsí su promé obra pa hóben di Teatro KadaKen: ‘E dekonstrukshon di Edsel K.’ E estilo moderno, kreativo i profeshonal tabata eksitoso. E presentashon a yena sala. Esei tabata e kuminsamentu. Despues a sigui kasi tur aña un produkshon nobo. Lou a lucha pa su soño di tin un sala di teatro pa Teatro KadaKen. Eksitosamente! Na fin di 2021 Teatro Aula den Huize Welgelegen ta habri su porta. Komo direktor, ku amor Lou ta krea posibilidat pa pone historianan di Kòrsou riba podio di un manera poderoso.
Nos ta e direktiva
Wesley Eleonora - Presidente
Kaminda kultura, herensia i profesionalismo ta topa, ei ta kaminda Wesley Eleonora ta aktivo den komunidat di Kòrsou. E ta traha pa desaroyo, aksesibilidat i inklushon. E ta hasi esaki komo spesialista den IT i komo boluntario. Por ehèmpel komo presidente di Teatro KadaKen pasobra nos ta representá inklusividat i rekonosimento, balornan ku e ta stima.
“Mi ta kere den forsa di kultura i arte di podio pa konektá hende i pasa historianan pa e generashon di awe i esun di mañan.”
Den direktiva di KadaKen, Wesley ta kontribuí na e proseso pa krea direkshon stratégiko, atendé loke ta nesesario pa e fundashon ta prepará pa futuro i kolaborashon ku otro partidonan. E ta mira nos komo parti importante di komunidat. Na KadaKen nos ta selebrá nos rais kultural, nos ta kompartí historia i nos ta bin huntu. E espasio ta awor. Esaki ta e lugá kaminda kultura ta biba i tur hende por sinti su mes bon biní.
Wernher Suares - Tesorero
Wernher ta stima palabra i idioma. P’esei el a haña su master den Ingles na Radboud Universiteit na Nijmegen. E tabata dosente di Ingles i Papiamentu. Pero su pashon ta, tradusí obra literario. Na Kòrsou e tin su mes ofisina di tradukshon Linguares LanguageStudio. Mas ku binti aña el a tradusí buki, buki pa mucha i kuentanan kòrtiku. E ta sostené KadaKen den direktiva pa su ròl importante den komunidat di Kòrsou. Pa Wernher ta bai pa e tema di e obranan i ku bo por reflekshoná riba nan.
“Den tempu di awe ta esensial pa nos pone un spil nos dilanti. E ora ei bo por puntra bo mes dikon nos ta komportá di sierto manera i pensa riba esaki. Asina un diskushon ta kuminsá i ku esei sanashon di nos komunidat”.
Zwendeline Vlijt - Miembro di direktiva
Tur hende tin un bos i un historia. Tur hende meresé ku ta skucha nan.Zwendeline ta konvensí di esaki. Su pashon ta traha ku hende, wak kon nan ta desaroyá. Arte i teatro ta instrumento poderoso pa logra yega na esensia di hende. E ta yuda nan pa hasi konekshon, ku nan mes i ku otro hende. Asina ei Zwendeline ta sinti su mes konektá ku e trabou di Teatro KadaKen.
“Na KadaKen tur hende por ta su mes. Ta un espasio sigur ku ta habri espasio pa diálogo, sanashon i bira konsiente. Bo ta sinti bo mes mirá, balorá i importante. Spesialmente ora bo ta hóben. Esaki ta algu ku nos komunidat mester.”
Zwendeline realmente ke nifiká algu pa Teatro KadaKen. E ta skucha, e ta yuda pensa i ta sostené e prosesonan den e organisashon. E tema den produkshonnan ta hopi pisá i profundo. Teatro ta yuda hende bira mas fuerte i mas empoderá. Esei ta toka su kurason. E no ta mira esaki komo un funshon solamente, sino komo un vokashon. Un kos ku tin sentido. Su deseo: wak KadaKen krese komo un organisashon ku tin impakto permanente riba hende i riba komunidat.
Nos ta e tim
Juranklin Marten – Tékniko
Burney Cruden – Kolaboradó Artístiko
Nacheska Johannes – Kordinadó di Edukashon
Tiffany Dunker – Asistente di Produkshon
Alexandra Martijn – Kolaboradó Artístiko
Melanta Ayon – Kolaboradó Artístiko
Rayla Heuijmans – Stadjèr
Margo Groenewoud - Investigadó
Bo ke komprondé historia i sosiedat di Kòrsou mihó? Chèns ta grandi ku Margo por yuda bo. E ta historiadó i el a spesialisá den historia sosial i kultural di Karibe den siglo 20 durante su estudio na Universidat di Leiden. For di 2008 te 2023 el a traha pa Universidad di Kòrsou. Den 2017 el a doktorá ku su tesis ‘Nou koest, nou kalm. De ontwikkeling van de Curaçaose samenleving, 1915–1973’, tokante desaroyo di nos sosiedat for di outoridat kolonial i di iglesia te na outonomia i siudadania. Margo ta konsehero i investigadó pa Teatro KadaKen. E ta un fuente di konosementu, e ta mantené nos skèrpi ku su preguntanan krítiko i ta saka potrèt durante presentashon.