Teatro Aula

Sala di ekspreshon

E sede di Teatro KadaKen ta Teatro Aula na Wishi.
A konstruí e espasio den aña 1930 den edifisio di Huize Welgelegen, mi konosí komo Habaai. Den e tempu ei, e edifisio grandi for di siglo 19 tabata un internat pa mucha muhé di famia pudiente for di region.

For di 1864, Zùsternan di Roosendaal tabata tin e mando. Imaginá bo: durante dékadanan e muchanan riku ta baila, kanta i por ta aktua den e “sala pa ekspreshon” akí. Pero sin públiko. Yunan di famia ku por a paga mas tabata tuma lès di piano òf práktika un instrumento di kuèrdè.

Tur mucha tabata risibí lès den: Kasteyano, Franses, Ingles,Italiano, Aleman, pero tambe kaligrafia, deklamashon, literatura, matemátika, siensia natural i historia di beibel i iglesia.
Pasobra na e internat akí, e zùsternan tabata tambe forma e hóbennan religioso i traha riba loke nan a yama “e bondatnan di kurason”.

Baño ku awa dushi

Den e promé desenionan di siglo 20, “Colegio del Sagrado Corazón”, òf Heilig Hart College, tabata un skol prestigioso. E edifisio na plantashon Welgelegen tabata den bon estado: klas i kamber espasioso, ventilá, limpi, baño ku awa dushi, i un patio. Afó tabatin un kancha di tènis.
Den 1930, e internat a risibí un ala nobo ku kuater klas, un oula i un kushina pa skol doméstiko. Hopi moderno pa e tempu ei. Riba e oula a traha un sala di drumi grandi ku muraya di palu di eiken. Den e asina yama ‘chambrette’ bo tabata tin algu mas di privasidat.

For di 1943, e internat a bira un kas di kuido bou di e nòmber Huize Welgelegen. Pa un tempu e oula a keda lugá kaminda muchanan di skol i adultonan manera músiko di jazz famoso Angel Salsbach i pianista kompositor Edgar Palm tabata tene nan presentashon. Tur dos músiko no tei ku nos mas.
Awor Teatro Aula, den edifisio di kuido, a bira atrobe un sentro pa arte, teatro i kultura.
bo no ta haña ta un kos maravioso ku bieu i hóben ta bin huntu bou un mesun dak?

Gloria bieu

“Nos ta spera ku ofisialmente e aña akí ta rekonosé e edifisio komo un monumento protehá, ya asina e por bin na remarke pa uso di fondo di Monumentenfonds pa restourá e edifisio,” e korant Antilliaans Dagblad di 26 di novèmber 2021 ta sita eksperto Michael Newton Newton a bisa esaki na apertura ofisial di Teatro Aula. A tuma un tiki mas tempu, pero den 2022 Huize Welgelegen a risibí status di monumento protehá.

Newton a proponé den 2021 pa restourá e aula “den su splendor original”. Promé paso: un gran invershon den sistema di lus i zonido—fundamental pa kualke teatro. Pero esei ta apénas kuminsamentu. E yudansa di hende ku ta sintí nan mes konektá ku desaroyo di arte di podio ta esensial. Nan ta nos defensornan , nos aliado. Personanan manera Etienne Pieters i Tania Kross.

Teatro moderno den gloria bieu

Huntu, nos a tuma e promé paso. Den 2022 i 2023, durante e aktividat di Boluntario Cura Doet, huntu ku empleado di kompania, amigunan i artistanan, nos a yuda limpia i fèrf e sala monumental. Den 2025, Teatro Aula lo ta kompletamente kla, instalá manera teatro profeshonal. Esaki ta nos mucha. Nos ta kuid’é.

Teatro KadaKen ta gusta akshon. Nos a tuma e inisiativa pa hasi un plan di renovashon segun e regla di Monumentenzorg. E plan di Jurgenys Lichtenberg, studiante di Fakultat Tékniko di University of Curaçao (UoC), ta kla den 2024. Nos por sigui. Nos ta bai renová. Nos ta konservá loke tin balor i bon, i nos ta agregá loke ta moderno i nesesario pa un nivel profeshonal.
E ta bai pasa. Esaki ta e sentro di arte di podio na Kòrsou.
Tur hende por sa: Aki ta kaminda kos ta pasa — na Teatro Aula!