Mula

Deskripshon

Mike ta kla. E ta warda. Awe lo e desvelá e monumentu MULA: prohibí pa lubidá. E tin un motto: “Si nos lubidá pasado, nos ta den!”
Mike ta konta di tempu ku el a mira inhumanidat den wowo di hende. Tempu ku e orkan di droga, atrako i regla kuenta a pasa riba Kòrsou i laga destrukshon atras. E ta papia di e siguiente orkan, e mal tempu na kaminda pa kua nos no ta kla. E úniko kos ku por salba nos, ta nos rekuerdonan.

MULA ta un presentashon impaktante tokante un époka skur den historia resien di Kòrsou. Tempu ku gulidó di bolita tabata yená sala di partida di Hato i pone nan bida na peliger pa skapa for di pobresa, paga debe, òf fiestá. Hopi no a logra. MULA ta tokante di e víktimanan akí ku deseo pa plaka brutu.

E período di 1997 pa 2007 te awe tin su refleho riba ambiente sosial i polítiko di Kòrsou. Ounke hopi hóben no a biba e tempu akí konsientemente, nan a krese den un pais afektá pa eroshon moral, kaminda mayornan a usa bruki di nan yu komo lugá pa smòkel, i hende a hasi nan kurpa komo kònteiner. E liña di normanan sosial, violensia i odio propio a kambia i ta parse ku e ta sigui disparsé ku kada generashon.

Den MULA, Schoobaar ku su solo presentashon ta saka tur loke e tin pa e mustra públiko su talento ku profundidat. Schoobaar ku su akstuashon ta mishi ku un tengla emoshonal ku ta sirbi komo un atvertensia ( ‘wake up call’) pa e generashon aktual i esun di futuro. E obra ta skibí pa Albert Schoobaar bou di direkshon di Milushka Birge i Albert Schoobaar.