Oudishon

Teatro KadaKen ta bai lanta un grupo di teatro nobo. i p’esei nan ta organisá dia 4 di aprel un oudishon den e sala di ensayo di Kas di Kultura pa buska 12 aktor pa e grupo nobo. E interesadonan mester ta di 17 aña bai ariba. Eksperensha anterior ku teatro no ta un mester. Loke ta importante ta e gana i kuriosidat pa teatro.
Tur interesado mester pasa inskribí nan mes dia 21 di mart na Kas di Kultura na Skalo entre 9or di mainta i 1or di mèrdia. Bo no por partisipá na e oudishon si bo no a inskribí bo mes dia 21 di mart. E dia ei tur partisipante lo risibí mas informashon i e material ku nan mester prepará pa e oudishon di dia 4 di aprel. Inskripshon pa e oudishon ta kosta Nafl. 15,-. Esaki ta pa e diferente tayernan i un lùnch dia di e oudishon.

E oudishon di dia 4 di aprel ta pa tur ku ta interesá, ku tin 17 aña òf mas bieu, i ku a inskribí nan mes promé dia 21 di mart entre 9or pa 1or na Kas di Kultura.

Dia kuater di aprel e oudishon ta kuminsá 8.45 di mainta i ta terminá 5or di atardi. Henter un dia pues. E dia ei e partisipantenan ta haña tayernan di drama, moveshon i aktuashon bou di guia di diferente dosente profeshonal. Na final nos ta skohe e diesdos integrantenan pa e grupo di Teatro KadaKen.

Teatro KadaKen ke forma un grupo ku ta dediká na e arte di teatro. Ku e arte aki Teatro KadaKen ke eksperimentá, inspirá, aktivá hende, fomentá diskushon, eduká, indagá, emoshoná hende. No solamente na Kòrsou, pero tambe den eksterior. Un meta di Teatro KadaKen ta tambe pa presentá den eksterior, bishitá festivalnan di teatro ku presentashonnan na nivel haltu.

E grupo ta bou di guia di Norma Cova (5208737) i Albert Schoobaar (5269401). Si bo ke mas informashon yama nos of mail Albert na schoobaar@yahoo.com