Produkshon nobo di Teatro KadaKen tokante e luchadó pa libertat Manuel Piar

Na kuminsamentu di aña skolar nobo Teatro Kadaken lo bai presentá un obra nobo den e Sala di Teatro na Habaai. Ta trata akí di un presentashon teatral musikal yamá ‘Piar: e último bataya’ ku teksto di Franklin Salgado i bou di direkshon di Milushka Birge.

E presentashon ta trata bida di Manuel Piar (1777-1817), luchadó pa libertat yu di Kòrsou ku tabatin un ròl krusial den terminashon di opreshon kolonial den nos region. Piar tabata forma parti di un movementu regional ku tabata mantené un relashon estrecho ku Kòrsou, i ku tabata di gran importansia pa a fomentá ideanan di libertat den e pueblo di su isla natal. E obra Piar ta un presentashon na papiamentu pa skol avansá i pa públiko en general ku sinku aktor den un esenario yen di músika i baile. Eric Calmes ta esun enkargá ku músika.
Segun lider komersial Maryluska – Lou – Nisbet di KadaKen : “Pa Kòrsou, konsiensia di impakto di kolonisashon i konsekuensia di esaki ta mashá aktual. Ku e obra Piar, Kadaken ta sostené e proseso di konsientisashon akí. Nos a ripará ku hopi hende konosé e nòmber Manuel Piar, pero tiki ta esnan ku realmente konosé su bida i sa kon bin e tabata un yu di Kòrsou importante den e lucha kontra podernan kolonial i opreshon.”
Piar su historia di bida ta hopi fasinante i ta duna nos hopi kuminda pa pensamentu. Pa skol avansá e presentashon tin aspektonan komun ku materianan manera Formashon Ekspreshon Artístiko, Historia, Siensia Sosial i Geografia ku temanan ku por sòru pa hopi tópiko di diskushon manera libertat i igualdat, identidat, importansia di Haiti pa nos historia, yalusia, poder i eksklushon.

Pa promé biaha KadaKen den kooperashon ku direktora Nathania Engelhardt di Debat.ed (Debate Education Foundation Curaçao) ta ofresé tayernan komo post-kuido na skolnan ku bishitá e presentashonnan i ku ta profundisá den e temanan na un manera strukturá.
Nisbet ta ferwagt hopi di e kuido akí:”Pa KadaKen esaki ta un paso importante mas den nos desaroyo. Dor di ofresé guia, nos ta oumentá impakto di e presentashon riba nos enseñansa. Nos por ofresé e tayernan akí grátis, danki na e sosten di “Vfonds”.

Durante e kuater añanan binidero Teatro KadaKen lo duna hóbennan e oportunidat pa deskubrí loke ta esensia di ta liber i di demokrasia. Nan lo eksplorá, diskutí i traspasá esaki pa nan mes bida i pensamentu.
“Nos ta hasi esaki den nos promé produkshon, dor di bai bèk den un periodo den historia den kual libertat tabata ser kuestioná ekstensamente”, Nisbet ta sigui elaborá. “ Manera semper ta trata akí di desaroyo di konsientisashon. Nos públiko lo disfrutá di e presentashon i alabes nan ta haña chèns di pensa riba kuestionnan sosial urgente. Nan lo keda konfrontá ku nan mes historia:”Kon nos a yega kaminda nos ta aworaki?”
Pero sí nos ta inkorporá e spiritu di tempu den e produkshonnan. Pa e motibu akí nos obra teatral musikal ta un presentashon atraktivo tantu pa skol komo pa un persona ku ke bishitá e obra riba su mes.
Un echo importante ta e ayudo ku KadaKen a risibí di “Fonds Podiumkunsten” ku pa promé biaha den historia a otorgá un supsidio di mas aña na e organisashon. E produkshon akí tabata posibel tambe ku yudansa di “Cultuurfonds Caribisch Gebied” i “Vfonds”.

Pa mas informashon tokante e presentashonnan pa skol, fabor tuma kontakto via e siguiente numbernan di telefòn 569 8417/672 4580 òf via di mail na: teatropafundeshi@teatrokadaken.org