Un reakshon di Ini Statia

L.S.

Djabièrnè 28 di ougùstùs último mi a presensiá estreno di e obra di teatro nobo E dekonstrukshon di Edsel K. skibí pa Albert Schoobaar i dirigí pa Silvia Andringa; un produkshon di Teatro Kada Ken. Mi ke felisitá henter e tim di Teatro Kada Ken ku e gran logro akí, spesialmente Albert Schoobaar (aktor/lider artístiko), Norma Cova (aktris), Eurshley Davelaar (aktor), Gideon Donker (aktor), Edwin Lopez Ramirez (produkshon), Laura Quast (dramaturgia), Ariadne Faries (diseño gráfiko), Jeroen Heuvel (material edukativo) i diferente otro mas ku a sostené i traha duru pa realisá e obra akí.

E obra a emoshoná i impaktá mi profundamente. Na un manera sutil i delikado i a la bes penetrante E dekonstrukshon di Edsel K. ta konta e historia di un amistat bunita entre Edsel i Kai ku fo’i chikí ta krese huntu den e mesun bario. E dos amigunan inseparabel ta primintí otro di sostené otro ni maske kiko pasa. Pero segun nan ta krese, ta bira mas difísil pa Edsel kumpli ku su promesa. Un suseso sin sentido i inkomprendibel ta laga tur hende babuká i ku e sintimentu di un misterio ku ta parse insolushonabel.

Kuater aktor ta konta e historia akí na un manera sorprendente. Hilaridat, humor, suspenso i emoshon ta interkambiá i flui kontinuamente den otro. Kada atributo i rekesito chikí ta duna su toke spesial na e esenario. Albert Schoobaar i su tim a sa di surpasá nan obranan anterior i trese e temanan di amistat, traishon, amor, toleransia i e kurashi pa ta bo mes riba un nivel mas universal i mas profundo ainda. A la bes e situashonnan presentá ta keda rekonosibel pa nos komunidat.

Durante henter e presentashon mi a sinta konstantemente na punta di mi stul; mi a hari, gosa, emoshoná ku awa na wowo, sigui pensa i reflekshoná. Na final bo ta sintibo kompletamente responsabel i parti di e totalidat ku nos ta yama bida. Manera ún henter e públiko a lanta para i keda aploudí minütnan largu. E sintimentu di katársis ku a dominá serka hopi hende na final ta esun di speransa i orguyo, komo sifuera ta nos komo habitante di nos isla a presta, krea i manifestá e realidat akí huntu.

No ta kedami nada otro di rekomendá tur hende pa bai wak e obra akí pa sikiera bo sali afó un tiki mas enrikesé òf a lo ménos ku un eksperensia di bida mas.

Lo presentá E dekonstrukshon di Edsel K. pa tur skol sekundario durante henter e aña skolar di 2009-2010. Ya kaba un sierto kantidat di skol di sigur 3000 alumno a inskribí pa wak e obra. Presentashon pa públiko general ta dia 4, 5 i 18 di sèptèmber, 2, 3, 30 i 31 di òktober, 6 i 7 di novèmber 2009 pa 8 or anochi na Huize Welgelegen, Habaai. Tur sobrá informashon ta den e anekso.

Kordialmente,
Ini Statia