Estreno obra teatral musikal “Rumannan Purunchi”  

Komunikado di Prensa

Kòrsou – Djasabra 16 di sèptèmber 2023  ta bai tin estreno di e obra teatral musikal na papiamentu “Rumannan Purunchi”  den Teatro Aula di Habaai. Pa promé biaha Teatro KadaKen ta presentá un obra speshal trahá pa muchanan grandi i hóben, di e kategoria di 10 pa 14 aña. El a bira un produkshon pa famia. Pa su tema ku ta atraé públiko, su kalidat haltu di müzik i aktuashon, lo e ta un fiesta pa tur generashon,  “Rumannan Purunchi” ta un fiesta pa tur generashon.

E obra teatral musikal ta basá riba akontesimentunan di bida real durante su hubentut di e konosidó eskritor Loekie Morales. Den su buki ku ta hiba e mesun título ku e obra, “Rumannan Purunchi, Morales ta kompartí e herensha spiritual riku di famia Moral. Milushka Birge, eskritor i direktor di esena a nutri su mes ku e herensha akí i basá riba dje el a traha un obra teatral.

E obra ta bai tokante un famia ku a pasa den yen kos, tantu doló komo alegria. E hóben Natasha ta purba pone su famia den akshon ora ku nan herensha i hinter e bario ta na peliger. No tin tempu di pèrdè. Pero ta parse ku tur hende tin nan mes pensamentu i sentimentu riba e tema. Por ta públiko lo por yuda Natasha?

“Rumannan Purunchi”ta laga e públiko pensa riba nos mes herensha, i riba sentido di komunidat i balor ku esaki tin. E obra ta presentá un “nèshi”kólorido kaminda e aktornan ta duna diferente personahe espasio pa nan ekspresá nan mes den kanto i wega. E talentoso elenko ta formá pa: Greysha Niebe, Gian van Eiker, Rachelle Le Blanc, Kionn Yung i Maxine Fabian.  Milushka Birge huntu ku kompositor i musiko Eric Calmes a krea e müzik pa “Rumannan Purunchi”.

Teatro KadaKen for di 2008 ta trese obranan teatral ku ta pone bo pensa i ta edukativo pa skol i komunidat. I for di 2020 Teatro Kadaken  tin na su enkargo maneho di e monumento nashonal Teatro Aula di Habaai. Por a desaroyá e produkshon akí danki na Prins Bernhard Cultuurfonds Region Karibe, Fonds Podium Kunsten i Vriendenloterij Fonds.
Skolnan di fundeshi, sekundario i enseñansa spesial ya a risibí nan pakete ku ta kontené algun buki i un pakete di lès ku kua klasnan por prepará pa nan bin wak e obra teatral musikal.

Djasabra 16 di sèptèmber2023 ta estreno di “Rumannan Purunchi” 7or di anochi. Un di dos chèns pa mira e obra ta djadumingu 17 di sèptèmber 2023 pa 4or di atardi. E wikènt despues nos ta present’é atrobe riba djadumingu 24 di sèptèmber 2023 pa 4or di atardi. Por bestèl karchi via di Caribbean Ticketshop òf kumpra na Mensings Caminada, Van den Tweel i Sentro di Pago Tu y Yo. Entrada pa mucha te ku 12 aña ANG12,50 i ANG25,00 pa muchanan mas grandi i adulto.  Lokalidat kaminda  e obra ta tuma lugá ta Monumento Nashonal Teatro Aula di Habaai, situá na Weg naar Welgelegen 64.

Pa mas informashon por tuma kontakto ku direktor di Teatro KadaKen sra Maryluska (LoU) Nisbet na +599 9 672 45 80