Pa mas hende por wak e obra TEATRO KADAKEN ta buska aliado

Komunikado di Prensa

Willemstad, 15 di òktober 2023

Teatro KadaKen mester di komunidat bira su aliado pa duna mas mucha i hende grandi oportunidat pa wak e obra teatral musikal “Rumannan Purunchi”. Estreno di e obra tabata 16 di sèptèmber último. Na promé instante e tabata un obra pa muchanan i hóben entre 10 i 14 aña. Pero promé ku estreno di e obra nos a sospechá, pa su tema, el o bira un obra ku lo kai na smak di hinter famia. I nos a haña rason. Hende di tur edat ta bin wak e obra i a keda enkantá. E hendenan akí a bai konta otronan ku tambe a haña nan kaminda pa Aula Habaai pa mira e obra i ku tambe a konta otro hende di e obra. I den e bisa otro di e obra a sali na kla ku tin grupo ku a tende di “Rumannan Purunchi” i ke bin wak’é. Pero pa falta di fondo nan no por yega. Ta trata di skolnan ku no por paga konvoi pa nan muchanan bin wak e obra i hende grandinan.

Huntu ku komunidat nos ke hasi posibel pa e dos gruponan akí bin wak e obra. Dianan 21 i 22 di òktober 2023 pa 7or di anochi nos tin un presentashon speshal di e obra na rason di ANG 100.00 pa entrada.

Loke e dos funshonnan akí generá lo hasi posibel paga bùs pa 7 skol (840 mucha) i 200 hende grandi bin wak e obra.

E obra teatral musikal “Rumannan Purunchi” ta basá riba historianan real di infansia di eskritor Loeki Morales. Milushka Birge ta e eskritor i direktor di esena ku ta nutri su mente ku e herensia familiar di rumannan Morales i krea un storia nobo. Milushka Birge huntu ku kompositor i musiko Eric Calmes a krea e müzik pa “Rumannan Purunchi”. I Lou Nisbet ta produktor di e obra aki na nòmber di Teatro KadaKen.

Despues di e presentashonnan speshal, públiko tin kuater chèns pa wak e obra. Esaki ta dianan 28 , 29 di òktober, 4 i 5 di novèmber 7or di anochi na Aula Habaai. Karchinan optenibel na Mensings Caminada, Van den Tweel, Sentro di Pago Tu y Yo i via caribbean ticketshop online.

Pa mas informashon por tuma kontakto ku produktor di Teatro KadaKen sra Maryluska (Lou) Nisbet na +599 9 672 45 80